ՄԱԿ-ի Ընդհանուր քարտուղարի բանբերը յայտնեց, որ վերջինս չորեքշաբթի, 22 յունուարը Սուրիոյ
շուրջ «Ժընեւ-2» խորհրդաժողովի գումարման թուական յայտարարած է: Բանբերը աւելցուց, որ
«Սուրիոյ մէջ տառապանքին վերջ տալու այս առիթը փախցնելը աններելի պիտի ըլլայ»: Սուրիոյ
հարցով ՄԱԿ-ի եւ Արաբական լիկայի յատուկ պատուիրակ Լախտար Իպրահիմի երէկ Ժընեւի մէջ Ռուսիա-Միացեալ
Նահանգներ-ՄԱԿ եռակողմանի հանդիպումէն ետք տրուած մամլոյ ասուլիսի մը ընթացքին յայտնեց,
որ «Ժընեւ-2» խորհրդաժողովին շուրջ ժողովները շինիչ էին»` նշելով, որ ներկայիս այդ խորհրդաժողովին
մասնակիցներուն ցանկին շուրջ քննարկումներ տեղի կ’ունենան: Ան յայտարարեց, որ 20 յունուարին
տեղի պիտի ունենայ եռակողմանի հանդիպում մը եւս, որ հաւանաբար «Ժընեւ-2» խորհրդաժողովէն
առաջ վերջինը ըլլայ: Իպրահիմի ըսաւ, որ խորհրդաժողովի գումարումէն ետք բոլոր հարցերը
սեղանի վրայ պիտի դրուին, եւ Սուրիոյ մէջ բոլոր կողմերուն կոչ ուղղեց` առանց նախապայմաններու
մասնակցելու խորհրդաժողովին: Ռուսիոյ արտաքին գործոց փոխնախարար Կենատի Կաթիլով յայտարարեց,
որ տակաւին «Ժընեւ-2» խորհրդաժողովին Իրանի մասնակցութեան շուրջ համաձայնութիւն չէ գոյացած: Միացեալ
Նահանգներու արտաքին գործոց նախարար Ճոն Քերրի ըսաւ, որ «Ժընեւ-2»-ը Սուրիոյ մէջ նոր
կառավարութիւն կազմելու լաւագոյն առիթն է, իսկ իր երկիրը սուրիական տագնապին քաղաքական
լուծումի մը հասնելուն դիմաց ծառացող արգելքներուն կը գիտակցի: ՄԱԿ-ի ընդհանուր քարտուղար
Պան Քի Մուն բոլոր կողմերուն կոչ ուղղեց «Ժընեւ-2»-ին աջակցելու եւ զայն յաջողցնելու
համար անհրաժեշտ քայլերը առնելու, ներառեալ` զինադադարի հաստատում եւ գաղթականներու տունդարձ`
աւելցնելով, որ «որեւէ բռնարարքի իսկական աւարտը Սուրիոյ տագնապին կատարեալ վերջն է»:
Ան ըսաւ, որ Սուրիոյ մէջ պատերազմը միջազգային ապահովութեան մեծագոյն սպառնալիքն է: